Është dëmtuar nga helikat e skafit në plazhin e Gjipesë teksa po bënte not një turist gjerman.
Nga informacionet parprake të policisë, skafi me drejtues K.V., 27 vjeç po lundronte jashtë zonës së sigurisë dhe në një distancë të konsiderueshme nga tapat që kufizojnë zonën e notimit, teksa në orën 13:40 dëmtoi turistin gjerman D.S., i cili po bënte zhytje në afërsi të skafit.
Menjëherë shtetasi gjermani u dërgua në spital për ndihmë mjekësore, ndërsa drejtuesi i skafit u shoqërua në Stacionin e Policisë së Dhërmiut. Ndërkohë vijon puna për zbardhjen e plotë të kësaj ngjarjeje.
Njoftimi i policisë:
Himarë/Informacion paraprak
Sot, rreth orës 13:40, në plazhin e Gjipesë, dyshohet se shtetasi K. V., 27 vjeç, banues në Orikum, duke drejtuar një mjet lundrues gomone me dokumentacion të rregullt, jashtë zonës së sigurisë dhe në një distancë të konsiderueshme nga tapat që kufizojnë zonën e notimit, ka dëmtuar, gjatë kohës që ishte duke bërë zhytje në afërsi të mjetit lundrues, shtetasin D. S., 46 vjeç, banues në Gjermani.
Shërbimet e Policisë Kufitare të SPK Dhërmi, menjëherë pas marrjes së njoftimit, kanë ndërhyrë duke i dhënë ndihmën e parë të dëmtuarit dhe më pas kanë organizuar transportimin e tij të menjëhershëm drejt spitalit, për ndihmë mjekësore.
Gjithashtu, shërbimet e Policisë kanë bërë shoqërimin e drejtuesit të mjetit lundrues, shtetasit K. V., në Stacionin e Policisë Dhërmi, si dhe të personave të tjerë që kanë qenë dëshmitarë në këtë ngjarje.
Vijon puna e grupit hetimor, nën drejtimin e Prokurorisë, për zbardhjen dhe dokumentimin e plotë të kësaj ngjarjeje.
