Shqipëria po përballet me një kërkesë më të lartë të turistëve sesa oferta e kapaciteteve akomoduese.
Kryetari i Unionit Turistik Shqiptar, Rrahman Kasa thotë se pavarësisht se kapacitetet akomoduese në vitin e fundit janë shtuar me 5 për qind, ato sërish nuk mjaftojnë.
“Jemi në fazën ku kërkesa është më e lartë se oferta, dhe pikërisht mungesës së strukturave akomoduese. Ne kemi refuzuar kërkesën për të shtuar dy avionë charter nga partnerët tanë, pasi nuk kishim mundësi akomodimi. Struktura akomoduese të reja ka që po bëhen, por janë të papërfunduara. Ose ka përfunduar shtesa ose hotele me kapacitete të vogla, por këto nuk na plotësojnë dot kërkesën e madhe”, shprehet kryetari i Unionit Turistik Shqiptar, Rrahman Kasa
Nisur nga kërkesa e lartë e turizmit të organizuar, Kasa thotë se duhen afro 30% më shumë struktura akomoduese.
“Së paku 25-30 % minimumi duhen për këtë vit pa llogaritur vitin 2026 që po vjen”, thotë Kasa.
Nga viti në vit vendi ynë po tërheq gjithnjë e më shumë turistë të huaj, që janë të interesuar jo vetëm për natyrën, por edhe për historinë. Sipas Institutit të Statistikave, numri i të huajve që kanë hyrë në vendin tonë në muajin Janar është rritur me 14.5% krahasuar me Janarin e 2024tës ku 97% e tyre janë nga rajoni i Europës./ Tv Klan
