Të paktën 36 persona janë plagosur në një fluturim të Hawai Airlines pasi avioni i tyre hasi në “turbulenca të rënda” në një fluturim nga Phoenix në Honolulu të dielën.
Incidenti ndodhi pak para se avioni, me 278 pasagjerë dhe 10 anëtarë të ekuipazhit, të zbriste të dielën.
Njëzet persona u dërguan në spitalet lokale me lëndime që varionin nga plagë, mavijosje dhe humbje të vetëdijes deri te lëndimet në kokë.
Në momentin e turbulencës në zonë u raportua për stuhi.
Fluturimi HA35 u ul në Aeroportin Ndërkombëtar Daniel K. Inouye në orën 10:50 (20:50 GMT) të dielën.
Në një deklaratë nga Hawaiian Airlines thuhej: “Kujdesi mjekësor iu ofrua disa pasagjerëve dhe anëtarëve të ekuipazhit në aeroport për lëndime të lehta, ndërsa disa u transportuan me shpejtësi në spitalet lokale për kujdes të mëtejshëm.”
Nga 20 personat e dërguar në spital, 17 ishin pasagjerë dhe tre anëtarë të ekuipazhit. Mes tyre është një foshnjë 14 muajshe dhe një adoleshente. Linja ajrore tha se po kryente një kontroll të plotë të avionit – një Airbus A330 – përpara se të kthehej në shërbim.
