Presidenti i Shteteve të Bashkuara, Donald Trump, ka zhvilluar një bisedë telefonike me presidentin e Turqisë, Recep Tayyip Erdogan, ku ka shprehur shqetësimin e tij për dhunën në Idlib të Sirisë.
Lajmi u bë i ditur nga sekretari për media i Shtëpisë së Bardhë, Judd Deere, i cili theksoi se Trump kërkoi që Rusia të ndalojë mbështetjen e saj për “mizoritë” e regjimit sirian dhe shprehu “dëshirën e SHBA-së për të parë fundin e mbështetjes ruse” për presidentin sirian, Bashar al-Assad.
Kreu i Shtëpisë së Bardhë po ashtu bëri thirrje për “zgjidhjen politike të konfliktit në Siri”.
E mbështetur nga sulmet ajrore të Rusisë, Qeveria e Sirisë ka bërë përparime të dukshme ditëve të fundit në Idlib, i cili është dhe bastioni i fundit i rebelëve anti-qeveritarë.
Nga ana tjetër, Turqia, e cila mbështet rebelët që duan rrëzimin e Assadit, i ka kërkuar Rusisë që të ndalojë sulmet, duke paralajmëruar se nëse nuk tërhiqen deri në fund të muajit, do të përdorë fuqinë ushtarake kundër forcave siriane.
Kombet e Bashkuara kanë thënë se 800,000 njerëz janë zhvendosur nga kjo zonë, që nga intensifikimi i luftimeve në muajin dhjetor./Opinion.al
