Nga dashuri, në urrejtje! Vazhdon të thellohet përçarja mes Presidentit amerikan Donald Trump dhe miliarderit Elon Musk, pas largimit të këtij të fundit nga qeveria amerikane.
Në një postim të fundit në rrjetin e tij social “Truth”, Presidenti Trump shkruan se Elon Musk u çmend pasi do t’i ndërpriten kontratat qeveritare për automjetet elektrike që ai zotëron, “Tesla”.
“Elon po “vuante shumë”, i kërkova të largohej, i hoqa Mandatin e Automjeteve Elektrike që i detyronte njerëzit të blinin makina elektrike, që askush tjetër nuk i donte. Ai e dinte prej muajsh se unë do ta bëja, dhe ai thjesht u çmend. Mënyra më e lehtë për të kursyer para në buxhetin tonë, miliarda e miliarda Dollarë, është të ndërpresim subvencionet dhe kontratat qeveritare të Elon. Gjithmonë jam habitur që Biden nuk e bëri këtë”, shkruan Trump.
Kreu i Shtëpisë së Bardhë reagoi edhe më herët.
Në një komunikim me gazetarët nga Zyra Ovale në Shtëpinë e Bardhë, Trump bëri të ditur se Elon Musk ndryshoi qëndrim kur zbuloi se nga ky projektligj preken edhe automjetet elektrike.
“Unë dhe Elon kishim marrëdhënie të shkëlqyer. Nuk e di nëse do vazhdojmë ta kemi. Ai ka thënë gjërat më të bukura për mua, dhe nuk ka thënë asgjë të keqe për mua personalisht, por jam i sigurt se mund të ndodhë në vazhdim. Jam shumë i zhgënjyer nga Elon Musk. Unë e kam ndihmuar shumë atë . Jam shumë i zhgënjyer sepse Elon e njihte këtë projektligj më mirë se pothuajse kushdo tjetër. Ai dinte gjithçka rreth saj dhe nuk kishte asnjë problem. Papritmas pati një problem dhe problemi u shfaq kur zbuloi se do të na duhet të shkurtojmë edhe kreditë tatimore për automjetet elektrike sepse kjo kushton miliarda Dollarë dhe është e padrejtë”, u tha Trump gazetarëve.
Nddërkohë, me një ton sarkastik dhe thumbues, Elon Musk reagoi menjëherë ndaj deklaratave të Donald Trump.
Teksa Trump ende po fliste përpara gazetarëve në Shtëpinë e Bardhë, Musk shkroi në platformën X: “Çfarë po thotë kështu…”, duke ironizuar qartazi fjalët e ish-presidentit amerikan.
Themeluesi i Tesla-s dhe SpaceX kritikoi ashpër një projektligj të ri të promovuar nga republikanët, duke shprehur zhgënjim për përmbajtjen e tij.
“Mbajini subvencionet për makinat elektrike dhe energjinë diellore edhe pse është krejtësisht e padrejtë që subvencionet për naftë dhe gaz natyror mbeten të paprekura, por hiqni atë mal me shpërdorime që keni ngjeshur në projektligj”, shkroi Musk.
“Në historinë e qytetërimit nuk ka ekzistuar kurrë një projektligj që të jetë njëkohësisht i madh dhe i bukur. Të gjithë e dinë këtë! Ose ke një projektligj të madh dhe të shëmtuar, ose një të vogël dhe të bukur. I vogli dhe i bukuri është zgjedhja e drejtë”, shkroi Musk.
Në një moment tjetër, Musk u rikthye në fitoren e Trump, ku pretendon se pa të presidenti amerikan nuk do te kishte fituar.
