Presidenti i SHBA, Donald Trump gjatë fjalës së tij në Asamblenë e Përgjithshme të Kombeve të Bashkuara ka sulmuar Kinën pas tensioneve të krijuara për tarifat e tregtisë si dhe për protestat që po zhvillohen në Hong Kong.
Trump ka akuzuar Kinën se nuk i është përmbajtur premtimeve për të miratuar reformat të cilat kanë lidhje me tregtinë ndërkombëtare.
“Jo vetëm që Kina nuk ka pranuar të miratojë reformat e premtuara, ajo ka përqafuar një model ekonomik, të varur nga pengesat masive tregtare, subvencionet e rënda të shtetit, manipulimi i valutave, hedhja e produkteve, transferimet e detyruara të teknologjisë dhe vjedhjet e pronës intelektuale e sekreteve tregtare në një shkallë të madhe”, deklaroi presidenti amerikan.
Gjithashtu, në fjalën e presidentit të SHBA nuk munguan dhe sulmet ndaj Iranit.
“Të gjitha kombet kanë për detyrë të veprojnë. Asnjë qeveri përgjegjëse nuk duhet të mbështesë dëshirën e Iranit për gjakderdhje. Për sa kohë që sjellja e rrezikshme e Iranit vazhdon, sanksionet nuk do të hiqen, por do të forcohen”, tha Trump./ Opinion.al E.Xh.
