Donald Trump po e shfrytëzon në maksimum fitoren e tij të re politike, pasi Robert Mueller e pastroi nga akuzat për bashkëpunim të mundshëm me Rusinë në zgjedhjet presidenciale të 2016-s.
Pas verifikimit të të dhënave, Kreu i Shtëpisë së Bardhë iu rikthye sulmeve ndaj mediave.
“Për dy vjet ato nxitën gënjeshtrën për një marrëveshje të fshehtë me Rusinë, ndonëse e dinin se ajo nuk ekzistonte. Ato vërtet janë armiku i popullit dhe partia e vërtetë e opozitës!”
Presidenti Trump përsëriti në Twitter thënien e një përkrahësi të tij se hetimi prej 22 muajsh i Prokurorit Special nuk duhet të kishte filluar fare.
Kujtojmë se në përmbledhje të konkluzioneve të Mueller, Prokurori i Përgjithshëm William Barr, tha të dielën se Trump dhe fushata e tij e vitit 2016 nuk patën komplotuar me Rusinë për ta ndihmuar atë të fitonte.
Sulmi i Trump ndaj mediave, vjen pasi ai dhe aleatët republikanë në Kongres u zotuan se do të kryejnë hetimet e tyre për kritikët kryesorë të Presidentit dhe për ata që qëndrojnë pas hetimit mbi lidhjet mes fushatës së vitit 2016 dhe përpjekjeve të Rusisë për t’i prishur zgjedhjet amerikane./Opinion.al
