Presidenti i Shteteve të Bashkuara, Donald Trump, bëri thirrje për veprime të menjëhershme për parandalimin e dhunës me armë zjarri, duke thënë se amerikanët duhet të dënojnë racizmin, urrejtjen dhe supremacinë.
Komentet e presidentit Trump vijnë pas të shtënave masive me armë zjarri, në Teksas dhe Ohajo, ku mbetën të vrarë 29 persona dhe të plagosur dhjetëra të tjerë.
“Këto ideologji të gabuara duhet të mposhten. Urrejtja nuk ka vend në Amerikë. Urrejtja shtrëngon mendjen, shkatërron zemrën dhe gllabëron shpirtin”, deklaroi presidenti amerikan në fjalimin e tij në Shtëpinë e Bardhë.
Ai bëri thirrje për reforma të kontrollit të armëve, dhe dënimin me vdekje për ata që qëndronin pas sulmeve.
“Njëzëri, kombi ynë duhet të dënojë racizmin, fanatizmin dhe supremacinë”, tha Trump.
Presidenti tha se kishte urdhëruar Departamentin e Drejtësisë të punojë me autoritetet lokale dhe kompanitë e mediave sociale për të zbuluar sulmet para se të ndodhin, teksa shtoi se interneti, rrjetet sociale dhe video-lojërat e dhunshme, po ndihmojnë në radikalizimin e njerëzve./Opinion.al
