Presidenti rus, Vladimir Putin, deklaroi se procesi i shkarkimit ndaj presidentit të SHBA-së, Donald Trump, ishte i bazuar në akuza të “ëndërruara”.
Duke folur në Moskë, në konferencën e tij të përvitshme për mediat, Putin tha se pret që Trump të mbetet në detyrë, pavarësisht se Dhoma e Përfaqësuesve votoi pro akuzave ndaj tij.
“Procesi ende duhet të kalojë në Senat ku republikanët me sa di unë e kanë shumicën”, tha Putin. Ai shtoi se “partia që humbi zgjedhjet po e vazhdon luftën me mënyra të tjera”, duke iu referuar Partisë Demokratike në SHBA.
Putin e krahasoi procesin për shkarkimin e Trumpit, me hetimet e mëparshme ndaj presidentit amerikan, lidhur me pretendimet për bashkëpunim me Rusinë, për të cilat Putin tha se ishin po ashtu të pabazuara në fakte.
Në konferencën për media të cilën e mbulojnë një numër rekord prej 1,895 gazetarësh, Putin tha gjithashtu se Rusia është e gatshme për të rënë dakord për një traktat të ri të armëve me Shtetet e Bashkuara, por shtoi se nuk ka pasur asnjë përgjigje deri më tani lidhur me çështjen.
“Nëse nuk ka një traktat të ri, atëherë nuk do të ketë asgjë në botë që do të ndalë garën e armëve, për të cilën unë mendoj se është gjë e keqe”, tha Putin.
Kujtojmë se dhoma, e kontrolluar nga demokratët, votoi për dy akuza kundër presidentit Trump: abuzim të pushtetit dhe pengim të punës së Kongresit, ndërsa vendimi përfundimtar, për shkarkimin ose jo të tij, pritet të merret në Senat./Opinion.al
