Donald Trump e ka quajtur Dukeshën e Sussex si “të keqe” (nasty), pasi ka dëgjuar se ajo ka bërë komente kritike rreth tij gjatë fushatës zgjedhore të vitit 2016.
Kur ishte duke punuar si aktore, Meghan Markle e përshkroi presidentin amerikan si “mizogjenist” dhe “përcarës”.
Ajo shtoi se do të shkonte në Kanada nëse ai fitonte zgjedhjet presidenciale të SHBA.
I pyetur për komentet e saj, Trump tha për ‘The Sun’ se ai nuk ishte në dijeni të tyre.
Por ai shtoi: “Nuk e dija se ishte kaq e keqe”. (I didn’t know that she was nasty)
Fjala ‘nasty’ në anglisht është ofenduese, kryesisht për femrat sepse nënkupton dikë që bën një sjellje të keqe, të pahijshme dhe me dëshirë.
Komentet e Presidentit Trump vijnë përpara vizitës së tij zyrtare shtetërore në Britani të Madhe javën e ardhshme, së bashku me disa nga anëtarët e familjes së tij.
Udhëheqësi i Shtëpisë së Bardhë do të mirëpritet në kopshtin e Pallatit të Buckinghamit, përpara se të marrë pjesë në një banket në një nga sallat e ballove të pallatit.
Ai gjithashtu do të zhvillojë një tur në Westminster Abbey.
Së bashku me bashkëshorten Melania dhe katër fëmijët e rritur, ai pritet të takojë Mbretëreshën, Princin Charles, Princin William dhe gruan e tij, Kate, Dukeshën e Kembrixhit.
Trump pritet gjithashtu të takojë Princin Harry, megjithëse gruaja e tij Meghan është aktualisht në lejen e lindjes me të birin Archie dhe nuk pritet të jetë në takim.
Dukeshja e Sussex e ka kritikuar më parë z. Trump dhe ka shprehur mbështetjen e saj për rivalen e tij, Hillary Clinton.
“Ju nuk jeni duke votuar vetëm për një grua nëse votoni për Hillaryn, sepse ajo është një grua, por Trump na e ka bërë të lehtë të kuptojmë, se nuk e dëshirojmë atë lloj të bote që ai do të ndërtojë”, ka thënë ajo në një intervistë të vitit 2016 në ‘The Nightly Show’ me Larry Wilmore.
Pavarësisht nga etiketimi i saj si “e keqe”, Trump tha se Meghan do të ishte një princeshë amekrikane “shumë e mirë”.
I pyetur për mendimin e tij në lidhje me faktin që Meghan ju bashkua familjes mbretërore, ai tha: “Është mirë, dhe unë jam i sigurt se do ta bëj shkëlqyeshëm, do të jetë shumë e mirë, shpresoj se ajo do të ketë sukses”.
Ai gjithashtu tha se Boris Xhonson do të ishte një “kryeministër i shkëlqyer”, duke e përshkruar atë si një “djalë shumë të mirë”.
Është shumë e pazakontë që një president i SHBA të përfshihet në çështjet e brendshme politike në Mbretërinë e Bashkuar dhe komentet e tij rrezikojnë të shkaktojnë një tension diplomatik.
Trump tha gjithashtu se ai ishte “me të vërtetë i dashur” në Britani të Madhe, duke shtuar: “Unë nuk kujtoj ndonjë president amerikan që ka qenë më afër vendit tuaj të madh”. /Opinion.al
