Donald Trump, po akuzohet sërish për racizëm. Gjithcka nisi në një konferencë për shtyp në Shtëpinë e Bardhë, ku një gazetare aziatiko-amerikane, e rrjetit CBS e pyeti Presidentin se pse ai vazhdon të pretendojë që SHBA po performon më mirë se vendet e tjera në drejtim të testimit për koronavirusin.
“Pse ka rëndësi kjo?” e pyeti Trump reporteren, e cila ka lindur në Kinë dhe ka shkuar në SHBA në moshën dy vjeçare.
“Pse është ky një konkurs global kur, çdo ditë, amerikanët po humbasin jetën e tyre?”, shtoi gazetarja, Weijia Jiang.
“Kudo në botë, po humben jetë. Dhe mbase kjo është një pyetje që duhet tia bëni Kinës. Mos më pyet mua, bëja këtë pyetje Kinës, apo jo? ”, ” iu përgjigj Trump.
Pas këtij dialogu, Presidenti i dha fjalën një reporter tjetër, ndërsa Jiang ndërhyri: “Zotëri, pse po ma thoni këtë mua, konkretisht?”.
Presidenti u përgjigj: “Unë nuk po ia them konkretisht askujt. Unë do ia thoja këtë kujtdo që do të shtronte një pyetje të keqe si kjo. ”
Gazetarja e CBS iu përgjigj menjëherë: “Kjo nuk është një pyetje e keqe.”
Trump më pas përfundoi papritur konferencën, ndërsa komenti i tij u dënua gjerësisht si racist.
Kreu i Shtëpisë së Bardhë është përplasur me Jiang edhe më parë, ashtu sic është kritikuar gjerësisht për sulm ndaj reportereve femra, dhe sidomos grave me ngjyrë.
Sikur kjo të mos mjaftonte Presidenti vazhdoi konfrontimin me gazetaren edhe në Twittër.
“Amerikanët aziatikë janë shumë të zemëruar nga ato që Kina i ka bërë vendit tonë dhe botës. Amerikanët kinezë janë më të zemëruarit nga të gjithë. Unë nuk i fajësoj ata! ”, shkroi Trump si një përgjigje ndaj incidentit.
