Donald Trump ka thënë se po planifikon të dorëzohet të enjten në një gjykatë në shtetin e Xhorxhias për t’u përballur me akuzat për ndërhyrje në zgjedhje.
Një gjykatës në Atlanta, i cili po mbikëqyr çështjen e ish-presidentit, ka vendosur lirimin me kusht për 200,000 dollarë (157,000 £).
Marrëveshja thotë se zoti Trump mund të mbetet i lirë në pritje të gjykimit për sa kohë që ai nuk përpiqet të kërcënojë ose frikësojë dëshmitarët.
“I pandehuri nuk do të kryejë asnjë veprim për të frikësuar ndonjë person të njohur për të si dëshmitar në këtë rast apo për të penguar në ndonjë mënyrë tjetër dhënien e drejtësisë”, thuhet në dosjen gjyqësore të postuar të hënën.
Urdhri u nënshkrua nga Prokurori i Qarkut Fulton, Fani Willis, i cili po mbikëqyr çështjen, dhe avokatët e zotit Trump.
Më vonë të hënën, zoti Trump postoi në platformën e tij të mediave sociale, Truth Social: “A mund ta besoni? Unë do të shkoj në Atlanta, Georgia, të enjten për t’u ARRESTUAR nga një prokuror i qarkut Radikal i Majtë, Fani Ëillis.”
Trump e përshkroi aktakuzën si një përpjekje të motivuar politikisht për të prishur fushatën e tij për rizgjedhjen në Shtëpinë e Bardhë.
Ai sugjeroi gjithashtu se kushtet e lirimit me kusht tregojnë se prokurori i qarkut duhet të ketë menduar se ai mund të përpiqet të arratiset nga SHBA.
Avokatët e zotit Trump u panë në gjykatën e qarkut Fulton në Atlanta më herët të hënën.
Sipas raportimeve, ata ishin atje për të takuar hetuesit dhe për të negociuar kushtet e garancisë me kusht.
Kur zoti Trump të dorëzohet, do të ketë një “bllokim të ashpër” të zonës së burgut të qarkut përreth, sipas Zyrës së Sherifit të Qarkut Fulton.
Jashtë gjykatës janë ngritur barrikada përpara dorëzimit të parashikuar të Trump këtë javë.
