Barriera e pakëpërcyeshme që Donald Trump kërkon të ngrejë në kufirin me Meksikën nuk do të jetë një mur çimentoje siç ai kishte premtuar, por një rrethim me shtylla hekuri të lyera me bojë të zezë, në mënyrë që të thithin nxehtësinë gjatë verës dhe ta bëjnë metalin shumë të nxehtë, në rast se ndokush do të përpiqet të kapërcejë rrethimin.
Majat e shtyllave do të jenë me majë, në mënyrë që të bëhet më e vështirë dhe e rrezikshme përpjekja për të kaluar kufirin.
Sipas “Washington Post” Trump u ka kërkuar këshilltarëve të Shtëpisë së Bardhë, drejtuesve të Departamentit të Sigurisë së Brendshme dhe inxhinierëve ushtarakë, të zbatojnë planin e tij, i cili me shumë gjasa do të rrisë koston e ndërtimit dhe mirëmbajtjes, dhe mund të çojë në kërkesa për fonde shtesë të kontribuesve nga buxheti i shpenzimeve ushtarake.
Presidenti Trump e ka cilësuar situatën në kufi një krizë dhe insiston se një barrierë e tillë, e pakapërcyeshme është e nevojshme për të ndaluar kriminelët që të hyjnë në SHBA.
Kujtojmë se Donald Trump shpalli “gjendjen e jashtëzakonshme” në kufi, që e lejonte në përdorimin e fondeve të emergjencës për ndërtimin e murit të shumëdiskutuar në kufirin me Meksikën. Demokratët e cilësuan shpalljen e “gjendjes së jashtëzakonshme” si “një abuzim flagrant me pushtetin”, e thanë se kriza e trumpetuar me të madhe në kufi, në fakt nuk ekziston, ndërsa iu bënë thirrje edhe republikanëve të bashkohen me ta./Opinion.al
