Donald Trump nuk do të përfshihet në hetimin e Rusisë, por edhe mund të ndryshoj mendje. Presidenti e quan hetimin ndaj Rusisë ‘një turp absolut’ dhe një ‘re të errët mbi kokën’ e tij.
Presidenti Donald Trump tha se ka vendosur të mos ndërhyjë në Departamentin e Drejtësisë, i cili po kryen një hetim të lidhjeve të dyshuara të bashkëpunëtorëve të tij me Rusinë, por po ashtu sugjeroi se kishte një pikë në të cilën mund të ndërhynte.
“Jam shumë i zhgënjyer me Departamentin e Drejtësisë. Kam vendosur që të mos të përfshihem në këtë hetim”, tha z. Trump në një intervistë të Fox News. Por ai shtoi se: “Mund të ndryshoj mendjen në një moment.”
Presidenti Trump ka kritikuar publikisht zyrtarë të lartë në Departamentin e Drejtësisë dhe Byronë Federale të Hetimeve mbi hetimin që po zhvillojnë mbi Rusinë, po ashtu thuhet se kritika ka patur edhe në mënyrë private dhe hetuesit janë kërcënuar me largim nga puna.
Në intervistën e Fox News, Presidenti Trump foli po ashtu edhe për atë që ai e quajti korrupsioni në FBI.
“Ju shikoni korrupsionin në krye të FBI-së, është një turp, dhe Departamenti ynë i Drejtësisë – të cilit përpiqem ti qëndroj larg, por në një moment tjetër, nuk do të jetë kështu – Sepse Departamenti ynë i Drejtësisë duhet të shikojë atë mbushje bajate qe e ka mbërthyer”, tha presidenti.
Presidenti Trump e quajti hetimin e Rusisë një “turp absolut”.
I përshkruar si një person i rreptë dhe metodik, prokurori special Robert Mueller po heton nëse ka patur një bashkëpunim të stafit të Trump me Rusinë në zgjedhjet për kreun e Shtëpisë së Bardhë .
Që nga emërimi i tij në muajin maj, si prokuror special në hetimin për marrëveshje të mundshme mes stafit të ngushtë të Donald Trump dhe Rusisë, Robert Mueller nuk është prononcuar për asnjë rast, duke preferuar të punojë në fshehtësi me një ekip prej 12 avokatësh, në zyrat në qendër të Uashingtonit, jo shumë larg Shtëpisë së Bardhë. Presidenti amerikan Donald Trump është përpjekur të pushojë këshilltarin e posaçëm Robert Mueller, por ai u tërhoq nga ky hap pas kërcënimit për dorëheqje nga një anëtar i skuadrës ligjore të Shtëpisë së Bardhë. Kështu raporton e përditshmja amerikane The Neë York Times, që citon katër individë anonimë pranë kësaj çështjeje. Sipas artikullit të së përditshmes, këshilltari i Shtëpisë së Bardhë Donald McGahn u shpreh se shkarkimi i Mueller do të kishte pasoja katastrofike për presidencën.
Nga ana tjetër Z. Trump dhe Moska kanë mohuar në mënyrë kategorike bashkëpunimin mes tyre për të ndërhyrë në zgjedhje.
Komentet e z. Trump të enjten pasuan javën e frustrimit mbi hetimin e Rusisë pas vendimit të FBI këtë muaj për të bastisur pronat e lidhura me avokatin Michael Cohen. Bastisja ishte pjesë e një hetimi – të referuar nga këshilltari special – në mashtrimet e mundshme bankare dhe shkeljet e fushatës financiare nga avokati.
Më parë këtë muaj, zoti Trump kaloi disa ditë duke menduar për shkarkimin e mundshëm të Zëvendës Prokurorit të Përgjithshëm Rod Rosenstein. Zëvendës Prokurori i Përgjithshëm Rod Rosenstein, i cili emëroi ish drejtorin e FBI-së Robert Mueller për të drejtuar hetimin lidhur me mundësinë e ndërhyrjes ruse në zgjedhjet presidenciale të Shteteve të Bashkuara, për ta ndihmuar zotin Trump që t’i fitojë zgjedhjet, i siguroi ligjvënësit se pa një arsye të fortë, ose të ligjshme, nuk do t’i zbatonte urdhërat nga Presidenti Trump ose kushdo tjetër, për shkarkimin nga detyra të prokurorit special, Robert Mueller.
Së fundmi sipas burimeve Z. Trump u takua me ekipin e tij ligjor të mbrojtës në këtë çështje pak ditë më parë për të diskutuar negociatat e arritje bisedimesh me z. Mueller.
Teksa njerëzit afër tyre po negociojnë një takim të mundshëm mes Trump dhe Muller. Rudy Giuliani, këshilltar dhe një nga njerëzit e afërt të Trump u takua me z. Mueller të martën, sipas një burimi në brendësi të kësaj çështje./Përshtatur për Opinion.al
Burimi: The wall street journal
