Për Hungarinë, Donald Trump do të jetë një faktor i rëndësishëm për arritjen e paqes midis Ukrainës dhe Rusisë. Këtë fakt e ka bërë të ditur, Ministër i Jashtëm i Hungarisë Peter Szijjarto gjatë një interviste për Agjencinë e Lajmeve Reuters.
“Ne shohim një shans për paqe nëse Presidenti Trump po fiton. Ne shohim një shans për marrëdhënie të mira Hungari-SHBA nëse Presidenti Trump fiton. Unë mendoj se duhet të ketë një ndikim shumë të fortë të jashtëm për t’i bërë ata të negociojnë. Kush ka shansin për ta bërë këtë në periudhën e ardhshme? Ky është vetëm Presidenti Trump nëse ai zgjidhet”.
Szijjarto tha se Hungaria nuk e sheh Rusinë si një kërcënim për anëtarët e NATO-s ose të Bashkimit Evropian, duke thënë se udhëheqësit e Rusisë janë “racionalë” dhe nuk do të rrezikojnë një konflikt të drejtpërdrejtë me Perëndimin.
Takimet e fundit të Viktor Orbanit me Putinin dhe presidentin ukrainas Volodymyr Zelenskiy tregojnë distancën e madhe që ndan të dy palët dhe liderët e tjerë perëndimorë.
Kryeministri hungarez Viktor Orban vizitoi Moskën javën e kaluar në atë që ai e quajti një mision paqeje, por nisma zemëroi disa nga kolegët aleatë të Budapestit në NATO, të cilët thanë se udhëtimi i dha legjitimitet pretendimeve të presidentit rus Vladimir Putin për territorin ukrainas të konfiskuar që nga pushtimi i Rusisë në vitin 2022.
Pozicioni i Hungarisë për Ukrainën është në kontrast me liderët e tjerë të NATO-s, duke përfshirë Biden, të cilët thonë se Kievi duhet të vendosë se kur të negociojë përfundimin e luftës. Ukraina thotë se nuk do të heqë dorë nga asnjë territor në një marrëveshje paqeje.
