Presidenti i SHBA-së, Donald Trump, shpalli të shtunën planin e tij për tejkalimin e mbylljes së pjesshme të qeverisë që zgjat më shumë se katër javë, por ende kërkon 5.7 miliardë dollarë për ngritjen e murit në kufirin me Meksikën.
Trump tha se plani i tij përfshinë 800 milionë dollarë për ndihmë emergjente humanitare dhe 805 milionë dollarë për teknologjinë e zbulimit të narkotikëve për të ndihmuar sigurinë e vendkalimeve kufitare.
Gjithashtu edhe dy mijë e 750 agjentë kufiri dhe profesionistë të rendit, si dhe 75 ekipe gjykatësish për të zvogëluar ngarkesën e gjykatave.
Sipas tij, plani përfshinë masa thelbësore për të mbrojtur fëmijët migrues nga shfrytëzimi dhe abuzimi.
“Kjo përfshinë një sistem të ri që u mundëson të miturve nga Amerika Qendrore që të aplikojnë për strehim në vendet e tyre dhe reformën për të nxitur bashkimin e familjeve për fëmijët e pashoqëruar”,- tha ai.
Trump u shpreh se për të siguruar kufirin, plani përfshinë 5.7 miliardë dollarë për ngritjen strategjike të pengesave fizike, apo murit, duke shtuar më tej se shkalla e krimit dhe problemet me narkotikët do të zvogëloheshin./rel.d/
