OBSH dhe administrata e presidentit amerikan, Donald Trump kanë këshilluar përdorimin e maskave në rrugë, si mjet parandalues për përhapjen e koronavirusit megjithatë Trump shtoi se kjo është çështje vullnetare dhe se ai vetë nuk do ta vendosë maskën.
“Maskat do të jenë një gjë vullnetare. Mund t’i vendosni. Nuk do të thotë se duhet ta bëni. Unë zgjedh të mos e bëj. Mund të jetë një gjë e mirë. Është vetëm rekomandim, me vullnet. Të vendos maskë teksa takoj presidentë, kryeministra, diktatorë, mbretër, mbretëresha, nuk e di. Nuk e shoh për veten time”, u shpreh Trump, (edhe pse ka ndaluar takimet me zyrtarë të huaj disa javë më parë.)
Udhëzimi nga Qendrat për Kontrollin dhe Parandalimin e Sëmundjeve erdhi pasi SHBA-ja raportoi për mbi 1,400 të vdekur nga koronavirusi, vetëm brenda një dite, dhe pasi studimet treguan një qëndrueshmëri më të gjatë të virusit në ajër nga ajo që mendohej.
Shtetet e Bashkuara deri më tani kanë mbi 278,000 raste të të infektuarve me koronavirus dhe mbi 7,000 viktima.
Shteti i Nju Jorkut mbetet zona më e goditur dhe guvernatori Andrew Cuomo ka kërkuar ndihmë nga pjesët e tjera të SHBA-së./Opinion.al
