Presidenti i Shteteve të Bashkuara të Amerikës, Donald Trump, u shpreh optimist për situatën koronavirusit në SHBA.
Teksa zhvilloi një takim me parlamentarët e Partisë Republikane, Trump u shpreh se Covid-19 me shumë mundësi do të zhduket në mënyrë autonome pa pasur nevojë për një vaksinë.
Sipas kreut të Shtëpisë së Bardhë, viruset vdesin si çdo gjë tjetër në këtë botë.
“Ka disa lloje virusesh ose gripesh për të cilat kërkohet një vaksinë, por nuk gjendet. Më pas këta lloj virusesh zhduken dhe nuk shfaqen më. Ata vdesin si çdo gjë tjetër në këtë botë”, u shpreh Presidenti amerikan.
Megjithatë ai shtoi se nuk mendon se kjo gjë do të ndodhë për nië kohë të shkurtër dhe paralajmëroi rreth 95 mijë viktima nga koronavirusi në SHBA, deri në fund të pandemisë.
“Thonë që do të zhduket, por nuk e di nëse do të jetë këtë vit. Por e rëndësishme është që ai do të zhduket. Nëse do të arrinim në krijimin e një vaksine, kjo do të ishte një ndihmë e madhe”, theksoi Trump./Opinion.al
