Presidenti amerikan, Donald Trump ka konfirmuar se Shtetet e Bashkuara do të largohen përfundimisht nga ‘Marrvëveshja e Parisit për Klimën’.
Ai e ka bërë këtë njoftim në një konferencë për energjinë në Pitsburg. Trump e ka përshkruar marrëveshjen si ‘të keqe’ dhe ka thënë se politikat e tij pro-karburanteve i kanë kthyer Shtetet e Bashkuara në superfuqi. Periudha më e hershme kur do të fillojë procesi i largimit të SHBA-së nga kjo marrëveshje është 4 nëntori.
Zbatimi i largimit të SHBA-së nga kjo marrëveshje do të nisë një vit më vonë, përkatësisht një ditë pas zgjedhjeve presidenciale në SHBA më 2020.
Marrëveshja e Parisit për Klimën ka mbledhur bashkë 195 kombe në betejën kundër ndryshimeve klimatike.
Sipas marrëveshjes, SHBA-ja duhet të ulë nivelin e gazrave serrë në 28 % deri në 2025.
Presidenti Trump ka thënë se nuk ka arritur të përmirësojë marrëveshjen, ndonëse burime diplomatike kanë thënë se ai nuk ka bërë përpjekje për rinegocim.
Ndërkohë Trump ka premtuar se do ta kthejë SHBA-në në superfuqi të energjisë andaj është duke tentuar të shfuqizojë një varg legjislacionesh për ndotje, në mënyrë që të ulë shpenzimet për prodhim të gazit, naftës dhe thëngjillit. Ai ka konsideruar planet e ish-presidentit amerikan, Barack Obama për ambientin, si luftë ndaj energjisë së SHBA-së.
