Presidenti Trump e ka përshëndetur firmosjen e marrëveshjes mes Kosovës dhe Serbisë në Shtëpinë e Bardhë, duke e cilësuar një angazhim historik, pas disa vitesh negociata të dështuara.
“Sot, jam i kënaqur të njoftoj edhe një angazhim tjetër historik. Serbia dhe Kosova janë zotuar secila për normalizimin ekonomik. Pas një historie të dhunshme dhe tragjike dhe viteve të negociatave të dështuara, Administrata ime propozoi një mënyrë të re për të kapërcyer ndarjen. Duke u përqëndruar në krijimin e vendeve të punës dhe rritjen ekonomike, të dy vendet ishin në gjendje të arrijnë një përparim real në bashkëpunimin ekonomik në një gamë të gjerë çështjesh.
Ne gjithashtu kemi bërë progres shtesë në arritjen e paqes në Lindjen e Mesme. Kosova dhe Izraeli kanë rënë dakord për normalizimin e lidhjeve dhe krijimin e marrëdhënieve diplomatike. Serbia është zotuar të hapë një zyrë tregtare në Jeruzalem këtë muaj dhe të zhvendosë ambasadën e saj në Jeruzalem deri në korrik”, tha Trump.
Presidenti vlerësoi angazhimin e Kryeministrit kosovar Hoti dhe Presidentit serb Vuçic në arritjen e marrëveshjes, për të cilën tha se e bën Ballkanin dhe botën më të sigurt.
“Është dashur një trimëri e jashtëzakonshme nga Presidenti Vuçiç i Serbisë dhe Kryeministri Hoti i Kosovës për të filluar këto bisedime dhe për të ardhur në Uashington për të përfunduar këto zotime. Duke vepruar kështu, ata i kanë bërë vendet e tyre, Ballkanin dhe botën më të sigurt.
Pres me padurim që Kosova dhe Serbia të arrijnë progres në çështjet ekonomike. Mezi pres të shkoj në të dy vendet në një të ardhme jo të largët. Jemi shumë krenarë për këta dy drejtues”, tha Trump gjatë konferencës për mediat./Opunion.al
