Presidenti Trump ka kërcënuar me sanksione të ashpra Irakun pasi parlamenti i tij u bëri thirrje trupave amerikane të largohen nga vendi.
“Ne kemi një bazë ajrore jashtëzakonisht të shtrenjtë që është atje. Kushton miliarda dollarë për tu ndërtuar. Ne nuk po largohemi nëse nuk na paguajnë për këtë,” u tha ai gazetarëve.
Duke folur nga avioni presidencial, Trump tha se nëse Iraku u kërkonte forcave amerikane të largoheshin mbi baza jo miqësore, “ne do t’u vendosim atyre sanksione që ata nuk i kanë parë kurrë më parë. Do të bëjë që sanksionet iraniane të duken disi të buta”.
Rreth 5,000 ushtarë amerikanë janë në Irak si pjesë e koalicionit ndërkombëtar kundër grupit të Shtetit Islamik (ISIS).
Të dielën, koalicioni ndaloi operacionet e tij kundër ISIS në Irak, dhe deputetët irakenë miratuan një rezolutë jo detyruese duke kërkuar që trupat e huaj të largoheshin.
Rezoluta u nxit nga blloku mysliman Shia i parlamentit – i cili është afër Iranit.
Tensionet janë të larta pasi SHBA vrau gjeneralin iranian Kasem Soleimani në Bagdad javën e kaluar.
Soleimani, 62 vjeç, kryesonte operacionet ushtarake iraniane në Lindjen e Mesme dhe u vlerësua si terrorist nga SHBA
Eshtrat e gjeneralit janë rikthyer tani në vendin e tij ndërsa turmat e veshur me të zeza mbushën rrugët e Teheranit të hënën.
Irani është zotuar për “hakmarrje të rëndë”. Kreu i ri i forcës së Iranit Quds është zotuar të dëbojë SHBA nga Lindja e Mesme.
“Ne premtojmë të vazhdojmë rrugën e dëshmorit Soleimani me të njëjtën forcë … dhe kompensimi i vetëm për ne do të ishte largimi i Amerikës nga rajoni,” citoi radioja shtetërore Esmail Qaanin. /Opinion.al
