Presidenti amerikan, Donald Trump i ka ofruar ndihmë Rusisë që të përballet me zjarret në pyjet e Siberisë, teksa synon të përmirësojë marrëdhëniet e Uashingtonit me Moskën.
Kremlini njofton se Trump ka telefonuar presidentin rus, Vladimir Putin për t’i ofruar ndihmën e tij. Nga ana tjetër Putin ka shprehur mirënjohje ndaj Trumpit dhe ka shtuar se mund ta pranojë këtë ofertë nëse situata përshkallëzohet.
Putin ka theksuar se kjo telefonatë e Trumpit është shenjë se Shtetet e Bashkuara dhe Rusia ndonjë ditë do të jenë në gjendje të përmirësojnë marrëdhëniet mes tyre.
Zjarret në Siberi janë nxitur nga temperaturat e larta që kanë arritur mbi 30 gradë Celsius dhe erërat e forta. Si pasojë e tyre mijëra persona janë evakuuar, ndërsa Rusia ka shpallur emergjencë kombëtare në pesë rajone siberiane dhe ka angazhuar trupat ushtarake për të ndihmuar në fikjen e zjarrit./Opinion.al
