John Bolton në librin e tij ka akuzuar Trumpin për sjellje jo të hijshme, që përfshinin në mënyrë eksplicite ndihmën e presidentit Kinez Xi Jinping për të rifituar zgjedhjet.
“Trump, në mënyrë mahnitëse, e ktheu bisedën në zgjedhjet e ardhshme presidenciale të SHBA, duke aluduar aftësinë ekonomike të Kinës dhe duke i’u lutur Xi ta ndihmonte të fitonte,”- shkruan Bolton, në portretizimin më të dëmshëm deri më sot dhe vetëm disa ditë pasi ish sekretari i mbrojtjes Jim Mattis akuzoi presidentin se po përpiqej të përçajë Amerikën.
Biden tha në një deklaratë: ‘Nëse këto fjalë janë të vërteta, nuk janë vetëm të pamoralshme, por janë shkelje e detyrës së shenjtë të Trumpit ndaj popullit amerikan’.
Përfaqësuesi i Tregtisë së Sh.B.A. Robert Lighthizer tha në dëshminë e Senatit që fjalët e Bolton ishin ‘absolutisht të pavërteta’.
Qeveria e Sh.B.A ka paditur Boltonin në mënyrë që ta bllokojë atë nga botimi i librit, duke përmendur rreziqe për sigurinë kombëtare, dhe po kërkon një seancë gjyqësore të premten. Botuesit Simon & Schuster kanë hedhur poshtë akuzat dhe thanë se ‘qindra mijëra kopje’ të librit janë shpërndarë tashmë.
Megjithëse administrata e Trump ka qenë kritike ndaj burgosjes masive të pakicës myslimane Ujgure dhe grupeve të tjera myslimane, Trump i dha Xi një dritë jeshile në qershor të 2019 në Osaka, Japoni, tha Bolton.
‘Sipas interpretuesit tonë, Trump tha që Xi duhet të shkojë përpara me ndërtimin e kampeve, për të cilat Trump mendoi se ishte saktësisht gjëja e duhur për të bërë,’ shkruante Bolton, duke shtuar se një tjetër zyrtar i lartë i Shtëpisë së Bardhë tha se Trump ka bërë komente të ngjashme gjatë udhëtimit të tij në nëntor 2017 në Kinë.
Bolton përmendi një sërë bisedimesh, në të cilat Trump demonstroi ‘sjellje tërësisht të papranueshme që shkatërruan vetë legjitimitetin e presidencës’.
Në fragmentet e botuara në Washington Post, Bolton shkruan se Trump tha se pushtimi i Venezuelës do të ishte ‘fantastik’ dhe se ishte ‘me të vërtetë pjesë e Shteteve të Bashkuara’. Qeveria e Sh.B.A ka thënë publikisht se nuk favorizon përdorimin e forcës për të rrëzuar presidentin socialist të Venezuelës, Nicolas Maduro.
Libri i Bolton ka ekspozuar edhe pamjen, ndonjëherë, të zbehtë që këshilltarët e Trump kanë për të. Gjatë një takimi në vitin 2018 me liderin e Koresë së Veriut, Kim Jong Un, Bolton thotë se ai mori një shënim nga Sekretari i Shtetit Mike Pompeo, që tallte Trumpin.
‘Ai është i neveritshëm,’ – tha shënimi i Pompeos, sipas një fragmenti të Bolton në Washington Post. Edhe pse Trump është publikisht kritik ndaj gazetarëve, libri i Bolton citon presidentin e Sh.B.A.-së në disa nga fjalimet e tij më alarmante deri më sot.
Në një takim veror të vitit 2019 në New Jersey, Trump tha që gazetarët duhet të burgosen, kështu që ata të zbulojnë burimet e tyre: ‘Këta njerëz duhet të ekzekutohen.’ – thuhet në një fragment tjetër në Post./ Opinion.al
