Presidenti i Shteteve të Bashkuara, Donald Trump deklaroi se i dërguari i tij për dialogun Kosovë-Serbi, ambasadori Richard Grenell, ka bërë një punë fantastike.
I pyetur nga Zëri i Amerikës para se të nisej për vizitën e tij në Indi, presidenti konfirmoi se Grenell do të vazhdojë të shërbejë si i dërguar i posaçëm për bisedimet megjithatë, shtoi se do të emërojë një ambasador të ri në Gjermani.
“Do të emëroj një ambasador të ri në Gjermani. Ambasadori Grenell do të vazhdojë si i dërguar për Kosovën dhe Serbinë pasi po bën një punë shumë të mirë. Ai i njeh mirë zyrtarët. Ka bërë punë fantastike. Do ta vazhdojë. Të gjithë thonin se ishte një marrëveshje e paarritshme, por ai e realizoi. Ishte dicka shumë pozitive për këto të dyja vende”, tha presidenti duke iu referuar marrëveshjeve të fundit për rihapjen e transportit ajror dhe hekurudhor Kosovë-Serbi.
Shtetet e Bashkuara emëruan ambasadorin amerikan në Gjermani, Richard Grenell si të dërguar të posaçëm presidencial për bisedimet Kosovë-Serbi, në tetor të vitit 2019.
Me ndërmjetësimin e tij, deri më tani Kosova dhe Serbia kanë nënshkruar dy marrëveshje, atë të hapjes së linjës ajrore Prishtinë-Beograd dhe marrëveshjen për linjën hekurudhore.
Po ashtu, javën e kaluar, presidenti Trump e emëroi ambasadorin Grenell si ushtrues detyre të Drejtorit të Inteligjencës Kombëtare./Opinion.al
