Organizata Botërore e Shëndetësisë deklaroi se më shumë se 7.8 milionë persona janë prekur nga Covid-19 dhe mbi 430 mijë persona kanë humbur jetën në të gjithë botën.
Vendi më i prekur mbetet Amerika por pavarësisht kësaj, presidenti Trump do të rinisë tubimet për fushatën elektorale.
Madje ai u kërkon pjesëmarrësve që të mos e padisin nëse infektohen me Covid-19 gjatë takimeve elektorale të tij.
“Ne do të fillojmë fushatat dhe besojmë se e para me siguri do të jetë në Oklahoma, Tulsa, Oklahoma,” u tha ai gazetarëve. “Do ta shihni se do të jenë fushata të tejmbushura”.
Trump shpreson të rizgjidhet për një mandat të dytë në nëntor por sipas sondazheve ai qëndron 14 pikë pas kundërshtarit demokrat Joe Biden.
Mënyra si ka menaxhuar krizën e koronavirusit ashtu edhe lëvizja Black Lives Matters, duket se e kanë ulur popullaritetin e tij.
Për shkak të kufizimeve nga virusi tubimet politike të cilat ishin kryesore për fushatën e tij në vitin 2016 kanë qenë të pamundura gjatë javëve të fundit./Opinion.al
