Grenlanda ka hedhur poshtë pretendimet se është e gatshme për shitje, pas raportimeve se presidenti amerikan, Donald Trump ka diskutuar privatisht me këshilltarët e tij idenë e blerjes së ishullit më të madh në botë.
“Ne jemi të hapur për biznes, por jo për shitje”, ka thënë ministrja e Jashtme e Grenlandës, Ane Lone Bagger për agjencinë e lajmeve, Reuters.
Bisedimet për blerje të Grelandës janë raportuar fillimisht nga The Wall Street Journal. Sipas prestigjozes në sytë e presidentit amerikan ky territor i madh pothuajse sa Evropa Perëndimore dhe i mbuluar në 80% të saj nga akulli, është një pikë strategjike e vyer në gjeopolitikën dhe në dinamikat ekonomike, sidomos tani që shkrirja e akujve në territore arktike po hapin rrugë të reja tregtare.
Trump e ka shpalosur disa herë mundësinë e blerjes së Groenlandës nga Shtetet e Bashkuara, shpesh si formë batute, por edhe me kërkesa specifike bashkëpunuesve të tij për të parë mundësitë reale.
Ndërkaq politikanët danezë kanë reaguar menjëherë ndaj kësaj ideje.
“Ideja se Danimarka është duke shitur 50,000 njerëz në Shtetet e Bashkuara, është plotësisht qesharake”, ka thënë zëdhënësi për Punë të Jashtme i Partisë së Popullit Danez, Soren Espersen.
Grenlanda është duke fituar vëmendje nga fuqitë e mëdha globale, duke përfshirë Kinën, Rusinë dhe Shtetet e Bashkuara, për shkak të lokacionit strategjik dhe burimeve minerale./Opinion.al
