Hakeri portugez, Rui Pinto, që tronditi themelet e futbollit duke publikuar vazhdimisht skandale për milionat e fshehura të sportistëve, dhe për manipulime të panumërta nga ta, do të ekstradohet nga shteti hungarez.
I famshëm për zbulimin e skandalit “Football Leaks”, hakeri u paraqit para një gjykate në Budapest. Kjo e fundit vendosi ta dorëzojë në organet e drejtësisë së vendeve ku kërkohet, për të dhënë shpjegime mbi mënyrën sesi vodhi dokumentet konfidenciale.
Mbi të rëndojnë një sërë akuzash si ajo e shantazhit, aksesit të paligjshëm në të dhëna private, krime kibernetike dhe zbulim i marrëveshjeve financiare të klubeve më të fuqishme futbollistike të globit.
“Është një çështje për jetë a vdekje. Ju lutem mos më riktheni sërish në Portugali pasi tani jam një njeri me shënjestër që kur u zbulua identiteti im. Kam frikë për jetën time dhe të familjes”, tha Rui Pinto./Opinion.al
