Kryeministri i Shqipërisë, Edi Rama është shprehur se nuk është ndjerë mirë nga deklarata e ministrit të Jashtëm të Gjermanisë, Sigmar Gabriel paraditen e sotme në një deklaratë për mediat në Tiranë.
Rama sqaroi sonte në emisionin “Dritare me Rudinën” në Vizion Plus se nuk u ndje fare mirë nga deklarata e tij, me arsyen se këto veprime të opozitës ndikojnë në imazhin e Shqipërisë.
Sipas tij, ministri gjerman, erdhi me një qëndrim të unifikuar të kancelares gjermane.
“Për të qene i sinqertë nuk jam ndjerë mirë, se është opozitë zyrtare e Shqipërisë, është parti e dytë e Shqipërisë, sado që është përgjegjësi e lidershipit të PD, kjo ndikon në imazhin e Shqipërisë. Këtu ka shumë për të bërë që njerëzit të bashkëjetojnë brenda ligjeve të Kushtetutës dhe ligjeve. Jam në komunikim të vazhdueshëm me kancelarin dhe me të tjerë dhe këtë opinion kaq shqip e shoh si shprehjen e një duf, lidhur me faktin që të gjitha përpjekjet e bëra nuk kanë gjetur fillin logjik”, tha Rama.
