Një sasi lënde plasëse ka shpërthyer në orët e para të mëngjesit të së dielës në korridorin e katit të katërt të një pallati në Elbasan. Ngjarja ndodhi rreth orës 2 e 30 në lagjen Haxhias. Shtëpia ku ishte vendosur lënda plasëse është në pronësi të një 59-vjeçari, por jeton me qira një grua me vajzën e saj.
Si pasojë e shpërthimit, është plagosur Enea Thomarai 26-vjeç, i cili banon në hyrjen përballë. Në momentin e shpërthimit ai ishte duke shkuar në tualet kur dera e banesës e përplasi në dysheme në korridorin e shtëpisë. Ai u dërgua menjëherë për ndihmë të specializuar në Tiranë. Babai i tij, i tronditur tregon momentin e shpërthimit.
“Veç kur pa i shpërtheu dera. Ja aty ka ikur në tualet, i shpërtheu dera i ka rënë në surrat. Se lloj qiraxhish vijnë këtu, duhet të vinin njerëz të mirë, familjarë. Dy çuna kam, shyqyr që nuk qëlloi edhe çuni tjetër. I kam njerëz të mrekullueshëm,çunat nuk ngatërrohen me asnjë lloj gjëje, janë të edukuar, janë njerëz të pastër, nga të gjitha anët. Janë në punë”, shprehet babai i Eneas mes lotëve.
Banorët e pallatit teksa tregojnë dëmet e shkaktuara nga shpërthimi shprehen se pas ngjarjes u bllokuan në banesa.
“Mirë që erdhi policia sepse nuk e hapnim dot derën. U bllokuam brenda. Biles unë burrin e kam sëmurë, nga zhurma kujtova njëherë mos me ra burri. Se ka një vit e gjysmë që nuk ecën dhe u tremba. Kam thërrit komshijen poshtë, i tha policisë, policia erdhi nga hapi derën sepse u bllokua”, thotë një banore.
“Më është dëmtuar xhami banjës, është thyer komplet. Kjo këtu (dera e jashtme), është thyer. Shpërthim shumë i fuqishëm, edhe tarraca është ulur pak se nuk ka qenë ashtu”, tregon një tjetër banore.
Në banesën ku është vendosur tritoli jetonin një 30-vjeçare e divorcuar nga Lezha dhe vajza e saj 9-vjeçare. Shpesh e reja vizitohej nga motra e saj. Kontaktet e 30-vjeçares me fqinjët ishin vetëm përshëndetjet e momentit. Mësohet se gruaja nga Lezha punon me rrjetet sociale. Për këtë ngjarje policia është duke hetuar në disa pista, mes të cilave ndonjë konflikt i mundshëm i pronarit të banesës, apo gruas që ka marrë banesën me qira.
