Një shtylle të tensionit të lartë i është vendosur tritol 4 ditë më parë në Thumanë, pak kilometra larg Tiranës. Sipas policisë askush s’ka patur informacion edhe pse ngjarja ka ndodhur më 13 Maj (4 ditë më parë). Vendosja e lëndeve plasëse në shtyllat e tensionit të lartë klasifikohet me ligj si akt terrorist. Nuk ka ende asnjë pistë hetimi policia për këtë ngjarje, ndërsa ka shoqëruar disa banorë të zonës.
Në një njoftim për mediat të shpërndarë sot Policia e Shtetit thuhet:
“Me dt 17.05.2017 u njoftuam nga OSHEE-ja se në vendin e quajtur Kodër Thumanë, ishte konstatuar dëmtimi i dy këmbëve mbajtëse të një shtylle të tensionit të lartë.
Menjehere në vendngjarje kanë shkuar shërbimet e Komisariatit të Policisë Krujë, të cilët kanë siguruar vendin e ngjarjes.
Nga kryerja e veprimeve verifikuese në terren është konstatuar se kanë ndodhur 2 shpërthime.
Dyshohet se shpërthimet kanë ndodhur në datë 13.05.2017 rreth orës 02:00.
Nga ana e uniformave blu janë shoqëruar 5 shtetas, me qëllim sqarimin e plotë të ngjarjes.
Shtetasit e shoqëruar banojnë në afërsi të vendit të ngjarjes dhe deklarojnë se para 3-4 ditësh kanë dëgjuar dy shpërthime të njëpasnjëshme, por nuk e kishin lokalizuar vendin.
Efektivet e Policisë kanë këqyrur vendin e ngjarjes dhe kanë gjetur dhe dërguar në Laboratorin e Policisë Shkencore për ekzaminime të mëtejshme:
• disa mbetje lënde plasëse e dyshuar eksploziv;
• rreth 40 cm fitil zjarrëpërcjellës i djegur;
• mbetje prej qelqi që është përdorur si mekanizëm për ndezje.
Veprimet e tjera procedurale po kryhen nga Specialistë të Drejtorisë Kundër Akteve Terroriste Tiranë”.
