Përpara se të fliste policia, lajmin zgjodhën ta jepnin përfaqësuesit politik të Partisë Socialiste. I pari ishte numri dy i PS-së Taulant Balla, ndërsa më pas Ministrja e Shtetit për Marrëdhëniet me Parlamentin Elisa Spiropali.
Bëhet fjalë për vendosjen e një sasi tritoli shtyllës së tensionit të lartë. Policia zyrtarisht njoftoi pas deklaratave të dy socialistëve, ndërsa thekson se njëra këmbë e shtyllës dyfishe të tensionit të lartë (400 KË), Nr. 65, e linjave Tiranë–Podgoricë dhe Tiranë-Prizren ishte dëmtuar me lëndë eksplozive.
“Grupi hetimor ndodhet në vendngjarje dhe po punon për zbardhjen e plotë të ngjarjes, identifikimin dhe kapjen e autorit/ëve”, njofton policia, pa drejtuar gishtin tek opozita.
Si Balla dhe Elisa Spiropali akuzuan opozitën që sipas tyre me këto akte duan të prishin imazhin e Shqipërisë. /Opinion.al
