Shpërtimi me tritol i regjistruar dy ditë më parë në qytetin e Durrësit ka ndodhur në lokalin e ish-deputetit Lefter Koka. Sasia e tritolit dyshohet se është hedhur me dron, te objekti në Lagjen Nr. 14 të qytetit bregdetar.
Sipas news 24 policia ka arrestuar për ngjarjen 44-vjeçarin Gentjan Meta, pasi iu gjet pulti i dronit me të cilin hodhi tritolin.
Sakaq, policia bëri me dije në një njoftim zyrtar dy ditë më parë se është arrestuar edhe B. Z., 34 vjeç, banues në Shetaj, Durrës, menaxher i lokalit në pronësi të autorit pasi nga kontrolli i ushtruar në automjetin e tij, shërbimet e Policisë gjetën dhe sekuestruan në cilësinë e provës materiale një armë zjarri pistoletë, me një karikator me 7 fishekë luftarakë.
Gjithashtu është proceduar penalisht edhe vëllai i autorit të dyshuar të ngjarjes, A. M., 46 vjeç, banues në Shijak, pasi nga kontrolli i ushtruar në banesën e tij në Shijak iu gjet një sasi vere me logon e një subjekti tjetër, veprime këto që bien ndesh me vendimin e gjykatës.
Lefter Koka ishte i shtati në listën e Partisë Socialiste në Durrës në zgjedhjet e 25 prillit dhe arriti të fitojë mandatin e deputetit./Opinion.al
