Ka shkuar në tre të vdekur bilanci i sulmit me armë në qytetin e Utrechtit, në Holandë. Disa persona të tjerë janë plagosur, pasi agresori qëlloi me armë në një tram. Ka qenë policia, e cila përmes një statusi në “Twitter” rreth orës 10:45 ka shkruar:
“Një incident me të shtëna në ‘24 Octoberplein’. Disa persona raportohen të plagosur, ndërkohë që ndihma është duke iu ofruar”. Fillimisht është raportuar për një të vdekur, ndërsa rreth orës 15:30 autoritetet holandeze kanë thënë se fatkeqësisht tre persona kanë humbur jetën.
Sipas gazetarëve lokalë, dëshmitarë nga vendngjarja kanë raportuar për një person të gjendur në tramin që udhëtonte drejt Utrechtit, i cili kishte nxjerrë armën dhe kishte qëlluar pasagjerët pa dallim.
Autoritetet thonë se agresori është ende i lirë, ndaj iu është kërkuar njerëzve që të qëndrojnë larg zonës ku ndodhi sulmi si dhe shkollat të mbajnë dyert mbyllur.
Po ashtu autoritetet po hetojnë ngjarjen si një sulm i mundshëm terrorist. Kryeministri Mark Rutte tha se ishte “shumë i shqetësuar” dhe anuloi axhendën./Opinion.al
