Horacio Sala, babai i futbollistit Emiliano Sala, ka ndërruar jetë në Argjentinë pas një ataku në zemër, vetëm 3 muaj pas rrëzimit të avionit që i kushtoi jetën të birit.
Fotoja e babait të pikëlluar deri në dëshpërim në mesin e mijëra personave që morën pjesë në funeralin e djalit të tij në muajin shkurt bëri xhiron e botës.
“2019 vazhdon të na shokojë me lajme të këqija në këtë qytet”, tha Julio Muller, një politikan lokal, i cili konfirmoi vdekjen e 58-vjeçarit Horacio Salas.
“Në orën 5 të mëngjesit, vajza dhe e shoqja më telefonuan dhe ishin tepër të mërzitura. Mjekët ishin aty, por kur unë mbërrita në shtëpi, ai kishte vdekur”, tha Muller.
Kujtojmë se Emiliano Sala ishte duke udhëtuar me një avion të vogël drejt Uellsit, për t’iu bashkuar skuadrës së tij të re Cardiffit, që sapo kishte arritur marrëveshjen me klubin e Nantes për blerjen e tij për shumën e 17 milionë eurove. Por sulmuesi nuk arriti kurrë në destinacion, pasi avioni me të cilin ai po udhëtonte, u zhduk dhe pas kërkimesh të shumta, u gjet në kanalin e La Manshit, bashkë me trupin e Salas./Opinion.al
