Komisioni Qendror i Zgjedhjeve do t’u japë nesër mandatet kandidatëve të opozitës që kanë pranuar të hyjnë në Parlament.
KQZ do t’i japë mandatin e Vlorës kryetarit të Ballit Kombëtar Adriatik Alimadhi, i cili është pjesë e listës së PD, Arben Elezit po nga lista e demokratëve të Elbasanit dhe Amra Barovës nga lista e Lëvizjes Socialiste për Integrim në Shkodër.
Kështu, ditën e enjte tre deputetët e rinj do të bëjnë betimin gjatë seancës plenare, duke e çuar në 99 numrin e përgjithshëm të deputetëve në Parlament.
Në deklaratat e fundit, Ambasada Amerikane ka thënë se Parlamenti duhet të mbushet me deputetë të cilët kanë të drejtën të ushtrojnë detyrën e tyre në funksion të reformave dhe integrimit të vendit.
Nga ana tjetër, Presidenti Ilir Meta në deklaratën që dha nga Pogradeci tha se njihte si të ligjshëm 82 deputetë të Kuvendit, pra vetëm ata që morën mandatin nga zgjedhjet e 25 qershorit dhe jo deputetët që kanë thyer urdhrat e PD dhe LSI për të bojkotuar Parlamentin./Opinion.al
