Tre gra janë ngujuar brenda një dyqani në Vlorë dhe kërcënojnë se do të vetëflijohen. Mësohet se këtë vendim ekstrem ata e kanë marrë pasi kanë rënë viktima të një mashtrimi.
Mësohet se gratë pretendojnë të jenë mashtruar nga firma ndërtuese e pallatit, e cila sipas tyre nuk i është përmbajtur aktmarrëveshjes që kanë bërë dhe nuk u kanë dhënë çka ata kanë pretenduar.
Sipas “News24”, njëra grua është rreth të 80-ve dhe dy rreth të 50-ve, kërcënojnë me vetëflijim, ndërsa edhe pas ndërhyrjes së policisë, ato kanë refuzuar të dalin jashtë ambientit duke kërkuar zbatim të aktmarrëveshjes që kanë bërë para ndërtimit pallati.
Njëra prej grave ka thënë se ka filluar të jetojë në këtë dyqan, pasi nuk i është dhënë në mënyrë të drejtë nga ndërtuesit aktmarrëveshja.
Ndërsa policia po tenton të bindë gratë të dalin nga dyqani.
Ata kanë marrë në dyqan edhe një bombol gazi dhe shefi i komisariatit është duke tentuar që të bindë gratë të dalin.
Ndërsa bashkëshorti i një prej grave u shpreh: Problemi qëndron se ne kemi bërë një marrëveshje dhe nuk i kanë qëndruar marrëveshjes. Kemi 10 vite. Na kanë thënë që nuk ua prishëm ne shtëpinë por shteti, po deshët merrni një apartament, po s’deshët asgjë, kemi dhe kërcënime, një nga ndërtuesit dje tha “do ta shikosh veten në ndonjë buzë kanali”.
