Diktatori i Koresë së Veriut, Kim Jong-un ka mbërritur në Vietnam ku do të zhvillojë takimin e dytë me presidentin amerikan Donald Trump.
Kim Jong-un ka mbërritur në Vietnam në rrugë tokësore, pas tre ditësh udhëtim me tren dhe me makinë nga Koreja e Veriut përmes Kinës.
Si në gjurmët e gjyshit të tij Kim Il-sung, që zhvilloi një vizitë të ngjashme në Vietnam në vitin 1964, diktatori zbriti nga vagoni i trenit në tapetin e kuq, i pritur nga rojet e nderit dhe një turmë e ekzaltuar që valëviste flamujt e Vietnamit dhe Koresë së Veriut. Më pas, ai ka marrë makinën Benz, ndërsa truprojat e kanë ndjekur me vrap nga pas.
Takimi mes Kim Jong-un dhe Trump do të jetë i dyti, tetë muaj pas takimit të parë historik që u mbajt në Singapor./Opinion.al
