Komisioni Qendror i Zgjedhjeve u ka dhënë mandatet tre deputetëve të rinj të opozitës. Në Parlament do të hyjnë Adriatik Alimadhi dhe Arben Elezi nga Partia Demokratike, si edhe Amra Barova nga Lëvizja Socialiste për Integrim.
Adriatik Alimadhi është kryetar i Partisë Balli Kombëtar dhe ishte pjesë e listës së PD-së në Vlorë. Nga ana tjetër, Arben Elezi ishte kandidati i pestë i Partisë Demokratike në Elbasan. Arben Elezi ka lindur në vitin 1974 në Peqin. Ndër eksperiencat e punës, në CV-në e tij përmendet puna si mësues në Peqin dhe më pas Drejtor i Hetimit Tatimor në Elbasan, por pa dhënë specifikime të tjera për vitet kur i ka kryer këto detyra.
Ndërkohë, Amra Barova do të jetë deputetja e 12-të e Lëvizjes Socialiste në Parlaemnt. Amra Barova ka lindur më 8 shtator 1992 në Shkodër. Pas studimeve të mesme në këtë qytet, ka përfunduar studimet për stomatologji në “Albanian University” në vitet 2010-2015. Si eksperienca pune, në CV-në e saj ajo rendit atë të pedagoges së jashtme me kohë të pjesshme në Universitetin “Aleksandër Moisiu” të Durrësit në periudhën nëntor 2016-mars 2017 dhe mjekes stomatologe në Drejtorinë e Shëndetit Publik nga marsi 2016.
Deputetët e rinj do të bëjnë betimin nesër në seancën plenare, duke e çuar kështu në 99 numrin e tyre në Parlament.
Në deklaratat e fundit, Ambasada Amerikane ka thënë se Parlamenti duhet të mbushet me deputetë të cilët kanë të drejtën të ushtrojnë detyrën e tyre në funksion të reformave dhe integrimit të vendit.
Nga ana tjetër, Presidenti Ilir Meta në deklaratën që dha nga Pogradeci tha se njihte si të ligjshëm 82 deputetë të Kuvendit, pra vetëm ata që morën mandatin nga zgjedhjet e 25 qershorit dhe jo deputetët që kanë thyer urdhrat e PD dhe LSI për të bojkotuar Parlamentin./Opinion.al
