Komisioni i Pavarur i Kualifikimit ka vendosur të rihapë hetimin për Ornela Naqellarin, kryetare e Gjykatës së Lezhës. Seanca e radhës do të mbahet ditën e enjte, në datë 21 Mars.
Ornela Naqellari, doli në seancë dëgjimore, ku u përball me një hetim të kryer në të tri kriteret e rivlerësimit nga Komisioni i Pavarur i Kualifikimit, por kanë qenë tre denoncime të publikut të cilat kanë ngritur dyshime për aftësitë profesionale të gjyqtares.
Për Naqellarin u diskutua denoncimi për dhënien e një vërtetimi në kundërshtim me ligjin. Për këtë rast, gjyqtarja sqaroi se bëhej fjalë për një praktikant të drejtësisë, i cili kishte ndjekur seancat gjyqësore për të marrë njohuri dhe kjo praktikë njihej me anën e një vërtetimi nga ana e titullarit.
Më tej, një tjetër denoncim i bërë ishte edhe ai i kancelares së Gjykatës, e cila ka pretenduar para KPK-së se Naqellari kishte pajisur me vërtetim një person, që nuk ishte paraqitur në gjykatë. Për denoncimin e kancelares, gjyqtarja pretendoi se shkeljet nuk ishin kryer nga ajo, por nga vetë kancelarja.
Në KPK ishte kryer edhe një tjetër denoncim, që gjyqtarja kishte qëndruar në një hotel në Lezhë, pronar i të cilit ishte një person, i cili kishte qenë palë në një proces të gjykuar nga Naqellari dhe që ishte marrë një vendim në favor të tij./Opinion.al
