Giovanni Trapattoni, trajneri që shkroi historinë e futbollit italian të shekullit të XX-të, mbush 80 vjeç këtë 17 mars, ditën kur do të luhet edhe derbi i Milanos, Inter-Milan. Në një intervistë të veçantë për “La Repubblica”, Trapattoni që në një karrierë 40 vjeçare si trajner ka fituar me Juventusin, Milanin, Interin, Bajernin, Benfikën dhe Salzburgun, flet për kujtimet dhe pengjet në karrierë.
“Milani është familja e parë, klubi që më bëri të realizoj ëndrrën time. Pa Milanin, historia ime do të ishte ndryshe. Juventusi është historia e gjatë e dashurisë, një grup i jashtëzakonshëm me të cilin u afirmova si trajner. Interi, një emocion i papërshkrueshëm, skuadra me të cilën provova nëse sukseset e mia ishin të lidhura vetëm me Juventusin. Nëse do të bëja një krahasim, Milani është adoleshenca, Juventusi martesa dhe Interi ndryshimi në mes të jetës”, ka thënë ai.
Pengu i karrierës është ndeshja Itali-Kore e Jugut, në Botërorin e vitit 2002. Trapattoni thotë se dëshiron ta luajë edhe një here, me një arbitër tjetër.
“Ajo që ndodhi në Botërorin e vitit 2002 u shkaktua nga arbitri, jo nga kundërshtari. Ai bëri një padrejtësi të madhe dhe goditi të gjithë Italinë. Nëse do të duhej të riluaja një ndeshje, do të ishte Itali-Kore, me një arbitër tjetër”, është shprehur Trapattoni.
Trapattoni thotë se futbolli është një klasik, si librat apo muzika që nuk do të perëndojë kurrë. “Futbolli është një prej klasikëve që nuk perëndon kurrë, pak a shumë si librat dhe muzika. Duhet të shohim se si interpretohet teknologjia dhe dija e ditëve të sotme. Sot gjithkush ka akses në një pafundësi të dhënash, ndaj mbledhja dhe katalogimi i tyre nuk është i mjaftueshëm. Sfida e së ardhmes është interpretimi dhe vlerësimi i këtyre njohurive. Unë jam i shqetësuar për humbjen e vlerave edukative që futbolli jepte. Më shqetëson edhe dhuna e tifozëve. Por nga ana tjetër, jam i lumtur për futbollin e femrave. Ka ardhur momenti që futbolli të kapërcejë kufijtë gjinorë”, ka thënë trajneri italian.
Trapattoni ka fituar gjashtë kampionate me Juventusin, një Champions League, dy Kupa Uefa si edhe shumë trofe të tjerë me Interin, Bajernin e Mynihut, Benfikën, Salzburgun apo Irlandën./Opinion.al
