Kryetarja e Lëvizjes Socialiste për Integrim, Monika Kryemadhi, ka bërë një akuzë të fortë ndaj kryeministrit Rama, lidhur sipas saj me transaksione të dyshimta parash në një bankë në Singapor.
Duke folur nga foltorja e parlamentit, Kryemadhi iu drejtua një prej ministreve të reja me fjalët:
“Kjo viktima këtu që vjen nga biznes i mesëm, e cila për hir të së vërtetës nëse familjes së saj i ka rënë në qafë drejtorja e tatimeve por vjen këtu edhe të mbulojë mashtrimet e shefit të saj që për hir të së vërtetës kishte bërë pak zhvillim, se deri dje vinte me çorape. Kjo zonja këtu duhet të kuptojë shumë mirë se banka e shtetit të Singaporit që ka falimentuar nuk mund të shpëtosh dot transaksionet e shefit tënd që të sakrifikosh fëmijët e tu për Edi Ramën. Nëse po dashuria jote për të i kaloka të gjitha hapësirat njerëzore.”
Nuk ishte e qartë se kujt iu drejtua Kryemadhi me këto fjalë, edhe pse nga përmbajtja e fjalive, duket se shigjetën e kishte nga ministrja e re e Financave, Anila Denaj.
