Presidenti i SHBA, Donald Tramp thotë se ndihet mirë pas infektimit me Covid-19, duke e përshkruar atë si “një bekim nga Zoti”.
Tramp u kthye në zyrën Ovale të Shtëpisë së Bardhë të mërkurën, thanë zyrtarët, më pak se një javë pasi ai rezultoi pozitiv me koronavirus.
Presidenti nuk ka shfaqur simptoma të Covid-19 prej më shumë se 24 orësh dhe ka qenë pa ethe për më shumë se katër ditë, tha mjeku i tij, Sean Conley.
Në një mesazh me video të mërkurën, Tramp tha se të gjithë amerikanët duhet të kenë qasje në trajtimet që iu dha atij.
Tramp premtoi gjithashtu të sigurojë falas ilaçet e prodhuara nga “Regeneron Pharmaceuticals”.
Ai tha se kokteji eksperimental i antitrupave që iu dha javën e kaluar ishte më shumë një kurë sesa një masë terapeutike, duke shtuar se qindra mijëra doza ishin gati. Por ilaçet e “Regeneron” nuk janë miratuar nga rregullatorët federalë.
“Ky ishte një bekim i maskuar – unë e kapa, kisha dëgjuar për këtë ilaç, thashë më lini ta marr dhe ishte e pabesueshme”, tha ai, duke shtuar se do të kërkonte autorizime për përdorim urgjent për ilaçet.
Disa orë më vonë, “Regeneron” paraqiti një kërkesë pranë Administratës Amerikane të Ushqimit dhe Barnave për aprovim emergjent për ilaçet, njoftoi “New York Times”.
Pas videos së Tramp, aksionet e kompanisë u rritën me 3.73%. Trump ka lidhje me drejtorin ekzekutiv të “Regeneron”, Leonard Shlaifer, i cili është anëtar i klubit të golfit të presidentit në Uestçester. Tramp ka gjithashtu në pronësi aksione të “Regeneron”, sipas deklarimit të tij në 2017 në Zyrën e Etikës Qeveritare. Sidoqoftë, aksionet nuk u renditën në deklarimet e tij më të fundit.
“Regeneron”-it deri më tani i janë dhënë më shumë se 500 milion dollarë në fonde nga qeveria për të prodhuar ilaçin, si pjesë e operacionit “Warp Speed”. /Opinion.al
