Gjykata e Strasburgut ka dënuar Shqipërinë me 15 mijë euro dëmshpërblim dhe 2,500 euro kosto gjyqësore për trajtim çnjerëzor dhe degradues dhe heqje e paligjshme e lirisë për shtetasin Arben Strazimiri, 47 vjeç.
Ky shtetas është arrestuar në vitin 2008 për tentativë vrasjeje por Gjykata e Tiranës vendosi se ai nuk mund të mbahej përgjegjës penalisht për shkak se vuante nga skizofrenia paranojake dhe për rrjedhojë urdhëroi mjekim të detyruar në një institucion mjekësor.
Fillimisht ai u dërgua në burgun e Krujës dhe më pas u transferua në spitalin e burgut të Tiranës prej vitit 2011. Sipas vendimit të Gjykatës ai është mbajtur në kushte të papërshtatshme të jetesës në spitalin e burgut duke shkelur kështu nenin 3 dhe 5 të Kartës së të Drejtave Themelore të Njeriut.
“Dhunim të nenit 3 (ndalimi i trajtimit çnjerëzor apo degradues) të Konventës Europiane për të Drejtat e Njeriut për shkak të kushteve të papërshtatshme të jetesës në spitalin e burgut ku z. Strazimiri është mbajtur i ndaluar nën kujdes të pamjaftueshëm psikiatrik, dhe dhunim të nenit 5 (e drejta për liri dhe siguri/e drejta për të ndalim të ligjshëm të vendosur shpejt nga një gjykatë), në veçanti për shkak të heqjes së vazhdueshme të lirisë së tij në një burg dhe jo në një institucion mjekësor për shkak se apeli i tij ndaj masës së ndalimit ka mbetur në pritje në Gjykatën e Lartë që nga viti 2016,” shkruhet në njoftimin për shtyp.
Përpos shkeljes së të drejtave të Strazimirit, Gjykata i bën thirrje autoriteteve shtetërore të ndërtojnë një institucion të posaçëm për personat me mjekim të detyruar.
“Kjo është në thyerje të detyrimeve statutore vendëse dhe tregon për një problem strukturor,” thuhet në njoftim. Shqipëria urdhërohet që të krijojë institucionet e përshtatshme për këtë problem dhe të sigurohet që ankuesi të marrë psikoterapi dhe jo vetëm ilaçe.
Gjykata vërejti se edhe spitali i burgut ka kushte degraduese për shkak se është në gjendje të rrënuar dhe nuk ka ngrohje qendrore. Por edhe cilësia e kujdesit mjekësor në burg u kritikua.
“Gjykata nuk u bind [për argumentin] se ai ka marrë trajtim të përshtatshëm psikiatrik. Trajtimi i tij mbështetej në përgjithësi në ilaçe psikotropike dhe ka pasur vetëm një psikiatrist për 84 pacientë në Spitalin e Burgut në Tiranë,” thuhet në njoftim.
Në përfundim, sorollatja në gjykata e një të dënuari me probleme shëndetësore mendore, trajtimi i tij në mënyrë jo të përshtatshme si dhe neglizhimi i faktit se Shqipëria ende nuk ka një institucion të posacëm për mbajtjen e personave të dënuar me probleme të shëndetit mendor, do t’i kushtojë taksave të shqiptarëve 17 mijë e 500 euro. Pritet ndërkohë një përgjigje e autoriteteve në lidhje me përgjegjësit e kësaj ngjarjeje. /Opinion.al
