Trajneri portugez i Iranit, Karlos Kueiroz është shfaqur shumë i inatosur pas përfundimit të ndeshjes midis Iranit dhe Portugalisë, ku mori vetëm një barazim.
Por përveç barazimit, trajneri ishte i inatosur edhe me arbitrin kryesor që nuk ndëshkoi Ronaldon më karton të kuq pas një bërryli që portugezi i vuri njërit prej lojtarëve të Iranit.
“Dukej qartë dhe pastër se Ronaldo i dha një bërryl, dhe ishte një karton i kuq. Rregullat nuk thonë se nëse është Mesi apo Ronaldo në atë rast, është më pak i kuq. Është si të them se vajza ime është shtatzënë. Unë duhet të di nëse do bëhem gjysh apo jo. Nuk dua të di nëse vajza ime është ‘pak shtatzënë’, apo më shumë. Kemi sjellë një teknologji të re, të quajtur VAR, që kushton sa qimet e kokës, me gjashtë njerëz që rrinë brenda një dhome, dhe të gjithë atje vendosën që ai bërryl i Ronaldos ishte thjesht një karton i verdhë. Nuk mund ta pranoj këtë gjë. Duhet ta dimë se kush e drejton ndeshjen, pasi askush nuk merr përgjegjësi.” ka thënë trajneri i Iranit.
Me këtë barazim të marrë, Irani nuk arriti dot të kualifikohej pasi u rendit vetëm në vendin e tretë në Grupin B me 4 pikë të grumbulluara.
