Sokol Cikalleshi është një prej emrave për të cilin ka interesime të vazhdueshme në kampionatin turk. Antaliaspor, skuadra në të cilën luan edhe Samuel Eto në repartin e avancuar, është emri i fundit që ka dalë në skenë si e interesuar për shërbimet e bomberit të Kombëtares.
Mirëpo, mediat turke raportojnë se drejtuesit e Basaksehirit do të tregohen shumë të kujdesshme deri në ditët e fundit të merkatos. Së fundmi, ka qenë trajneri i Akhisarit që ka bërë me dije edhe situatën e shqiptarit te Basaksehiri.
“Unë e kam kërkuar Cikalleshin që në ditën e parë të grumbullimit që kemi bërë për të përgatitur sezonin e ri. Jam i bindur që ai është njeriu i duhur që na duhet në repartin e avancuar për të na udhëhequr si në gjysmën e dytë të sezonit të shkuar. Madje, kam folur edhe me vetë lojtarin dhe ai e dëshiron një rikthim te ne, por problemi është te drejtuesit e klubit.
Ata nuk duan të nxitohen dhe do të vendosin për Cikalleshin vetëm në ditët e fundit të merkatos”, ka deklaruar trajneri i Akhisarit. Sokol Cikalleshi shënoi 7 gola me skuadrën e Akhisarit gjatë pjesës së dytë të sezonit 2016-’17 në Superligën turke. Bomberi i Kombëtares u aktivizua në 14 ndeshje, 11 prej të cilave si titullar.
