Një seri e re dokumentarësh tre-pjesësh i televizionit “Sky news”, pretendon se Nënë Tereza kishte anë të errëta. Ajo ishte në gjendje të ndalonte luftërat, të miqësohej me presidentët, të ndërtonte një perandori globale për jetimorët dhe të lironte të burgosur të sëmurë nga burgu, megjithatë, Nënë Tereza mbuloi gjithashtu problematikat më të mëdha të kishës katolike dhe dukej më e tërhequr nga varfëria dhe dhimbja sesa t’i ndihmonte njerëzit t’i shpëtonin.
Ky është pretendimi që ngrihet në dokumentarin që mban titullin: For The Love Of God, ku kanë folur miqtë e saj më të ngushtë dhe kritikët më të hidhur që i shërben rivlerësimit të plotë të një prej grave më të famshme të shekullit të kaluar.
Nënë Tereza, një murgeshë katolike me origjinë shqiptare, shkoi në një mision për të ndihmuar ata që ishin prekur rëndë nga uria në Bengal, Indi, në vitin 1943, raporton Daily Mail. Pasi u transferua në Kalkuta, ajo mori lejen nga kisha për të krijuar Misionarët e Bamirësisë (kongregacion fetar katolik i krijuar në vitin 1950 nga Nënë Tereza, e njohur tani në Kishën Katolike si Shën Tereza e Kalkutës).
Që në fillim, dhembshuria dhe sharmi i saj ishin të binjakëzuara me një qëndresë të parezistueshëm.
Navin Chawla, një nëpunëse civile që u bë një mike e ngushtë e Nënë Terezës, e dëshmoi këtë kur i kërkoi një toger-guvernatori rajonal një tokë ku mund të kujdesej për njerëzit e sëmurë me lebër. Ajo e përloti guvernatorin dhe iu dha më shumë se dyfishi i tokës që ajo kishte shpresuar.
“Ajo kishte dinakërinë e një fshatari”, kujton Navin. “Ishte shumë e përqendruar, pak kokëfortë. Rashë menjëherë në dashuri me të.”
Fjala filloi të përhapej dhe në vitin 1969 një ekip dokumentarësh i BBC filloi të hetonte. “Përvoja e atyre vendeve ishte pothuajse e tepërt për t’u duruar. Këtu ishte kjo murgeshë që kishte marrë përsipër atë që shumica e njerëzve do të shmangnin” -kujton producenti Peter Chafer ditën kur ajo i mori ata në misionet e saj.
Ajo ishte një grua mjaft e jashtëzakonshme. Mendova, “le të përpiqemi ta vendosim në vëmendje”. Kur doli dokumentari, të gjithë u çmendën,” thotë producenti.
Ajo u bë një personazh i famshëm brenda natës, u derdhën të ardhura dhe në 1979 ajo fitoi Çmimin Nobel për Paqen. Por a ishte gjithçka ashtu siç dukej?
Seriali tregon se kishte probleme që nga fillimi që doktori britanik Jack Preger punoi me urdhërin e saj të bamirësisë dhe u trondit nga ajo që pa.
“Murgeshat nuk po jepnin kujdesin e duhur. Gjilpërat përdoreshin vazhdimisht të pasterilizuara. Një gruaje me djegie iu refuzuan ilaçet kundër dhimbjeve, unë i futa kontrabandë disa për të. Ata kishin para për të drejtuar një spital të mirë për njerëzit e varfër, por nuk e bënë kurrë. Ata thanë: Ne do të lutemi për lehtësimin e dhimbjes pa ofruar trajtim,” deklaroi ai.
Dhimbja nuk ishte vetëm një nënprodukt i punës së saj, por një pjesë integrale e saj. Murgeshat u udhëzuan të rrihnin veten dhe të mbanin zinxhirë teli me thumba.
“Shpirtshmëria e saj ishte e lidhur me Jezusin në kryq. Ai dha jetën e tij në dhimbje dhe ajo besonte se të jepte veten me vuajtje ishte vlera më e madhe. Ideja ishte se vuajtja e shpengonte dhe e shpëtonte botën”, tha Mary Johnson, e cila punoi me Nënë Terezën për 20 vjet.
“Ajo mendonte se të qenit e varfër ishte mirë sepse Jezusi ishte i varfër. Është skizofrenike si mendim”, thotë Mary Johnson.
Dekada e fundit e jetës së Nënë Terezës ishte ndoshta më e vështira.
Ajo po luftonte me pleqërinë, por kisha po i bënte thirrje për të ndihmuar në shpëtimin e saj nga skandali në rritje i abuzimit të fëmijëve nga priftërinjtë.
“Ata do ta dërgonin atë në qytetet ku po zbuloheshin skandale. Ajo mund të ndryshonte historinë,” thotë Mary.
Sa ishte Nënë Tereza në dijeni të skandaleve? Është e pamundur të thuhet, por, siç u zbulua kur Reverend Donald McGuire u dyshua për abuzim, ajo i shkroi një letër autoriteteve duke këmbëngulur për besimin e saj tek ai. Kjo gjë solli dhe abuzimin e tij edhe për një dekadë tjetër me qindra djem.
Përfshirja e saj në skandal u mbyll, por trashëgimia e saj ishte njollosur. Ishte shenjtore apo mëkatare… apo pak nga të dyja?/Opinion.al
