Një 44-vjeçar shqiptar humbi jetën në terminalin e aeroportit të Malpensas në Milano të Italisë. Viktima është 44 vjeçari shqiptar, Aldo Laçi, raporton “Repubblica.it”.
Ai ishte nën ndikimin e kokainës dhe bënte veprime të pakontrulluara, ndaj policët e aeroportit e ndaluan. Sakaq familjarët pretendojnë se vdekja nuk ka ardhur nga lënda narkotike por nga agresioni i policëve, ndaj kanë kërkuar hetime të thelluara.
Aldo Laçi, kishte shkuar me pushime në Itali. Teksa ndodhej në terminalin 1 të aeroportit duke pritur bashkëshorten, policët përpiqen ta ndalojnë atë. Në fund, pesë oficerë e bllokojnë. Në këtë moment 44 vjeçari ndjehet keq dhe pëson arrest kardiak, shkruan “Repubblica”.
Familja e tij, nëpërmjet avokatit Enzo Lepre, paraqiti një ankesë, sepse janë të bindur se pavarësisht gjendjes së tij të rënduar, vdekja u shkaktua nga policët që morën pjesë në aksionin për ndalimin e tij. “Nga videokamera duket qartë” – shkruan avokati- se pasi Aldo Laci u godit për herë të parë në kokë, pastaj në qafë, u hodh në tokë dhe më pas në mënyrë të përsëritur policët e grushtuan”.
Por prokurori ka thënë se “nuk kishte asnjë dëmtim të viktimës dhe analiza toksikologjike ka treguar se vdekja ka ardhur si pasojë e e helmimit akut me kokainë”. Kësisoj prokuroria i ka kërkuar gjykatës të pushohet çështja ndaj policëve të paditur nga familjarët e viktimës. Këta të fundit shprehen se do të vazhdojnë të kërkojnë drejtësi /Përshtati: Opinion.al
