Kobe Bryant, ylli legjendar i basketbollit që luajti për 20 vjet me Los Angeles Lakers, humbi jetën pasi helikopteri me të cilin po udhëtonte u rrëzua dhe shpërtheu në flakë.
Ngjarja është akoma më tragjike pasi mësohet se në bordin e helikopterit ishte dhe vajza e tij 13-vjeçare Gianna Maria Onore e njohur ndryshe si Gianna.
TMZ Sports raporton se burime nga përfaqësues të Bryant kanë konfirmuar se ai po udhëtonte sëbashku me vajzën e tij drejt Akademisë Mamba për një praktikë basketbolli.
Në bordin e helikopterit Sikorsky S-76 po udhëtonin 5 persona të cilët janë konfirmuar se kanë vdekur.
Rrëzimi ndodhi pak para orës 10 të mëngjesit në kodrat sipër Calabasas në Los Angeles në kushtet e mjegullës.
Rrëzimi i helikopterit përfshiu në flakë shkurret dhe pemët përreth dhe kjo e bëri të vështirë për zjarrfikësit dhe personelin e urgjencës për tu futur në zonë sipas Los Angeles Times.
Bryant, 41 vjeç, i njohur me pseudonimin ‘Black Mamba’, ishte tërhequr nga basketbolli në vitin 2016. Ai ishte padiskutim një nga lojtarët më të mirë të gjitha kohërave duke fituar 5 herë (2000–2002, 2009, 2010) titullin kampion në NBA dhe duke u shpallur 2 herë MVP në finale dhe një herë për sezonin.
Ai ishte i martuar me Vanessa Laine Bryant në vitin 2001 dhe kishin katër vajza Gianna, Natalia dhe Bianca dhe Capri e porsalindur. Kohët e fundit Bryant kishte qenë i pranishëm në lojërat e NBA me vajzën e tij Gianna, një basketbolliste në rritje. /Opinion.al /Opinion.al
