Në rrënojat e urës së shembur të Xhenovas, ekipet e emergjencës janë në luftë me kohën. Dyshohet se nën rrënoja janë më shumë se 10 persona ende të pagjetur. Kanë kaluar më shumë se 48 orë nga tragjedia dhe shpresat janë që të ketë ende persona të gjallë nën rrënoja.
Por krahas rrënojave, prej nga deri më tani janë nxjerrë trupat e 39 viktimave të tragjedisë, shqetësim për banorët dhe autoritetet përbën pjesa e mbetur e urës e mbetur ende më këmbë, e cila mund të shembet nga momenti në moment dhe të shkatërrojë banesat poshtë saj. Nga zonat e rrezikuara janë evakuuar dhjetëra banorë, të cilët kanë nisur të protestojnë pasi ende nuk po u jepet një zgjidhje e qartë se çdo të ndodhë me ta.
“Me shumë gjasa do të na mbeten vetëm me çelësat e shtëpisë. Këtë e dimë. Kushdo që banon poshtë një vepre në këtë gjendje duhet të marrë parasysh të gjitha rreziqet. Por duam vetëm që të na llogarisin në këtë situatë”.
Prokurori i Xhenovas tha se hetimet për tragjedinë janë përqendruar tek një gabim njerëzor. Akuzat që mund të ngrihen janë vrasje e shumëfishtë dhe atentat ndaj sigurisë publike.
Zv/kryeministrat Salvini e Di Maio bënë përgjegjëse shoqërisë koncensionare të mirëmbajtjes së autostradave “Autostrade per l’Italia”. Kryeministri Xhuzepe Konte shpalli të mërkurën nisjen e verifikimeve për përgjegjësitë e tragjedisë, që mund të çojnë deri në heqjen e koncensionit për firmën Beneton, ndërsa kërkoi prishjen e pjesës së mbetur të urës.
Megjithatë kompania e konsideron të jashtëligjshme heqjen e koncensionit, duke paralajmëruar se do të kërkojë dëmshpërblim financiar për pjesën e mbetur të kontratës. Megjithatë, zyrtarët e kompanisë thanë se janë të gatshëm ta rindërtojnë të gjithë urën, brenda 5 muajve.
