Sulmi me armë brenda në një shkollë në Beograd, me 9 të vrarë dhe disa të plagosur ka tronditur të gjithë vendin.
Nëntë persona të vrarë, mes tyre 7 nxënës të një shkolle, një mësuese dhe roja e sigurisë kanë humbur jetën, ndërsa 7 të tjerë janë plagosur, dy prej të cilëve janë në gjendje të rëndë.
Ndërkohë, Serbia ka shpallur 3 ditë zie kombëtare për të nderuar viktimat e masakrës.
“Në emër të Ministrisë së Arsimit, shpreh keqardhjen time më të thellë për tragjedinë më të madhe që i ndodhi Serbisë dhe sistemit tonë arsimor. Askush nuk mund t’i kthejë fëmijët te prindërit e tyre.
Ngjarja ka ndodhur rreth orës 08:40 kur një nxënës i klasës së shtatë ka kryer një akt brutal për herë të parë në Serbi. I jam mirënjohës mjekëve, si dhe mësuesve dhe të gjithëve që u përpoqën të parandalonin tragjedinë. Një ekip psikologësh ndodhet në vendngjarje për të ndihmuar nxënësit dhe punonjësit.
Është e paimagjinueshme kur i sheh ato skena, si ishte për ata fëmijë. Qeveria ka marrë vendimin për shpalljen e tri ditëve zie duke filluar nga dita e premte.
Sot pasdite nuk do të ketë mësim. Nga nesër mësimi do të fillojë me një minutë heshtje. Serbia është një pjesë e botës ku gjëra të tilla ndodhin gjithnjë e më shpesh.
Ndikimi i internetit dhe lojërave, si të thuash, i vlerave perëndimore, është katastrofik dhe është i nevojshëm një kthesë totale”, thuhet në deklaratën e ministrisë.
Autori i ngjarjes dyshohet të ketë qenë i mituri Kosta Keçmanovic, 14 vjeç, ku rreth orës 8 të mëngjesit të sotëm ka plagosur rëndë mësuesen me armën e të atit si dhe disa të tjerë dhe ka lënë të vdekur rojen e sigurisë.
Sipas të dhënave, e gjithë ngjarja e përgjakshme ka nisur sot pikërisht nga inati që kishte ndaj mësueses së historisë dhe klasës ndaj të cilës ka nisur të qëllojë./Opinion.al
